خروج موكب الامام زين العابدين والسبايا من الشام الى كربلاء
…………………………………………
زينب غريبه .. برض المصيبه
…………………………………………
(1)
يا شام بالاحزان عنّچ بنروح
نقضي الليالي والسهر بس للنوح
فوق الجرح يبچي الالم عالمذبوح
وبراس اخونا اعلى الرمح دم مسفوح
واحنا ابمصيبه .. اديارچ غريبه
نرجع نمر اعلى الخوف .. بنزور هَلْنا ابلطفوف
برض المصيبه
…………………………………………
(2)
رجّعْنا حدّاي الظعن بالآهات
درب اليسر مر بينا باب الساعات
واتذكرِت وقفاتنا اشكد مُرات
باتت بنات المصطفى مذعورات
باب المصايب .. اذّى الحبايب
عظم الاذى صحنا ابآه .. والراس لما ادفناه
برض المصيبه
…………………………………………
(3)
يا روح من بعد اليسر خليني
ارجع بقيع امي ابكتر دفيني
لا اتباري منّي اجروح وتشافيني
خليها يمكن بالشفا اتأذيني
عمر القضيته .. يصعب مبيته
يمضي العمر وستناه .. يقضي الاجل من يدناه
برض المصيبه
…………………………………………
(4)
وصّلنا ارضچ كربلا وامودعين
خبريني وين اهل الصفا مدفونين
وين الكفيل اوين مدفون احسين
وين الشباب ابتربتچ مقبورين
لمست تُربهم .. شمّت عطرهم
واتلقت احسين ابحال .. ضجت معاها الاطفال
برض المصيبه
…………………………………………
(5)
صبت على اقبور الاحبه الدمعه
بقلوب طاحت عالقبر متلوعه
تتذكر ايام المضت والجمْعَه
شمت تربهم والتراب اتودعه
من ودّعِتْهم .. لا ما عِفتهم
باخذ ترب من لقبور .. ونصب عزا ابكل عاشور
برض المصيبه
…………………………………………
(6)
فوق القبر لمن غفت شافتهم
يمشوا ابسكينه والمجد شامتهم
عرفتهم ابدار العلا حطتهم
تتمنى كانت رافقت رحلتهم
تدري ابْحِلِمها .. يحچي عِلِمْها
شافت مساكنهم دور .. ولجنه تُعْمُر لقبور
برض المصيبه
…………………………………………
(7)
نطلع نفارق كربلا بالحسره
تحت الترب ملحود شيخ العتره
لضلوع منه امهشمه اومتكسره
نمشي اونعظم بالأجر للزهره
وانا رُجوعي .. كسّر ضلوعي
نرجع بَلَيّا الشبان .. يا كربلا بالاشجان
برض المصيبه
…………………………………………
ابو مصطفى ال يوسف
7 صفر 1440 هـ
16 اكتوبر 2018
