أرشيف القسم: اجتماعي

……………………………………

اذا شِفْت إلْلِي قِدْامُك تَرَسْ مَاعُون

لا اتْحَسِّب ابْإيدِه يِغْرُف الملّاس

لِأَنِه مِثِلْ طَالِب لو عَطِيتِه اكْتَاب

وابْخَمْس الثَوانِي يِقْرأ إلْكَرّاس

لِأَنْ بِعْيُونِه فَاهِم يِبْصُم إلْمَكْتُوب

ولا يِحْتَاج يِشْرَح لِه احَدْ دَرّاس

تِنْظُر سَكْبِتَه أسْتَاذ بِالقَانُون

تِكْشِف خِدْعَتِه بُوفِيِة إلْأعْرَاس 

تَارُكْ لِه بَطِنْ وِمّنْ الأكِلْ جُوعَان

صَفْصَفْ قَائمَة بِعْيُونِه هَمْ وَضْرَاس

يَمّه هَم طِفِل مَعْذور شَاف استاذ

صَايُر قِدْوَتِه صَابُه نَفِس لِحْساس

لا انْتَعِب نَفِسْنَا وبالذِّكُر مَنْصُوص

شَيطَان إلْمُبَذِر اخْوَتِه هَالنّاس  

كِل شِي يِنْوَزَن يِتْحَدَدْ ابْمِعْيار

كِلْ زَايِدْ نِعِدِّه خَالَفْ إلْمِقْيَاس

خَلْ اتْشِيع عِدْنا نِعْمَة إلتَوفِير

كِلْ وَفْرَه أمَل تِحْيِي حَيَاة انْفَاس

……………………………………

ابو مصطفى ال يوسف

٢٣ يوليو ٢٠١٦

………………………………….

هالديره تِضُم كل ناسها ابليل

من يشرق صُبُحْهَا يفرح إنْهَار

يقول الليل يامحلاها لنفاس

اجمعها ورد وجمعها ازهار

هالليل ابلسان الحال للناس

ديرتكم حُضُنْ والدار اسرار

قلت الها يديره لو تِسِمْحين

اسرارچ جميله وتصلح اخبار

قالت قول واكشف عنّي متريد

تِحَرّى بالنقل توصيل لفكار

داخل داركم تهت آنا ياناس

طلعت داركم اوسع من اديار

فيها الماي ينبع وسط لبيوت

يحيي للزرع والباقي انهار

فيها الطّير لمن راد يرتاح

لجله تنحني اغصان لشجار

تمشي بالطرق كل الرجاحيل

لكن عينها متلبسه استار

مشهد كنت اشوفه مره واعيد

نسوان ابخِدِر تخشاها لنظار

منظر شافته اعيوني من ابعيد

شفت شايب ضرير اوحوله لصغار

ظنيت ابفعلهم بس يأذوه

لقيت افعالهم من فعل لكبار

اثاري ابخدمته يتبادروا ابشوق

كل واحد جوابه يبدي بصرار

اذا لصغار عدهم هاذي لفعال

اظن يبذر ثمرهم بحلى لثمار

بعدها الديره ما تخلى من الخير

تزيد ابخيرها تتعدى لسوار

حواليها بحر من نسمته ايطيب

كل مهموم من يشكي له اضرار

والديره تِزِين ابكل عمل خير

كل واحد تشوفه ابوالده بار

من تغرب شمس تغرب بلنجوم

لأن ضي ديرتي يسطع بلاقمار

اشوف الديره كنها تتسع كون

قريبه امن السحب بس تبعد امتار

وِحْسِب كم وفيْ للديره موجود

ما نوفي لها لو قدِر معشار

في الديره طفل للناس مألوف

لو يسرح لِعب ما حوله اخطار

للديره مظاهر تشرح انفوس

للحشمه اثر والناس اخيار

كل شي تطلبه بالديره موجود

من قرص الخبز واللوز واكنار

مسقوفه ابسعف لبيوت والطين

من ذاك الوقت تنحاط بحضار

لبيوت انْبَنت لكن بلا سور

عيب اعلى الذي يبنيها بجدار

كلنا ابديرتي اهليه وانصير

يربطنا الوفا والجار للجار

عزيزه ديرتي ما ترضى بالضيم

ولا حتى بَرُضها تحضن اشرار

تتغنى النواخذ وسط لبحور

موال البحر مكتوب بشعار

تريد احچي وزيدك بالشعر بيت

ديره تكتب الموال بطوار

اذا دار الهوى لامس النخلات

غنّت بالسعف نغمات لوتار

لهجة ديرتي من بين لهجات

لكن تِنْعُرف وابشتى لقطار

هدير الماي نغمه تجذب الطير

طبيعي الماي ينبع منها لآبار

خيرات البحر نعمه اعلى لبيوت

تِرْسَتها سمچ بالغزل سكّار

لوما البحر كان الغيم عطشان

من ماي البحر تنزل الامطار

دشّات البحر ليها البحاحير

ما يوم ارْجَعَت من دون محّار

مابين البحر وابيوت للناس

مسرح للعب والهول تذكار

مثلچ ديرتي القاها في وين

ذرّه فاخره مثلچ فلا صار

سلام التعزفه بالنوته مكتوب

قصيده امسطره والوزن نصّار

صلاة ابديرتي مِتْمَيْزَه عالْكون

صلاة اعلى النبي وآله الاطهار

…………………………………..

ابو مصطفى ال يوسف

12 ذو القعدة 1439 هـ

25 يوليو 2018

رحم الله الامهات المؤمنات الفاضلات الرحيمات واخص امهاتي ام رضا وام امين رحمهم الله تعالى بواسع وحمته.

” فقد امي ام رضا رحمها الله آلمني كثيرا ولكن وجود عمتي ام امين اعطاني الكثير من عطف الام وحنانها.

انا لم افقد امي من الدنيا تماما الا بعد ما فقدت عمتي ام امين امي الثانية .. هنا اصبحت بلا ام فعلا “

………………………………….

امي ابكل قصيده تنكتب بيت

تشهد لي القصيده ابحال شاعر

اتعلّمْت الشعر من دون استاذ

تسع اشهور غذتني المشاعر

تتسلى ابرباتي الليل ونهار

من ازعل اطيِّب لِيَّه خاطر

تعرف امي والله معنى لحساس

وحساسي بقى بشعاري وافر

امّي اتصيح من تحضُر للحسين

دمعها اللي نزل من صنفه نادُر

قمت اكتب اسمها ابقلم شفاف

خطيته ابدمعها امن المحابر

امي اهيه المدينه ابليا عنوان

لحدها ايصير في كل المقابر

لأنْ برزخها واحد تشترك فيه

كل أمْ ليها دمعه امن المنابر

ازيدك من فضلها بالشعر بيت

من الزهرا يقولوا الخبر صادُر

كل ام ليها دمعه ابشهر عاشور

خلتها البتوله اويا الأكابر

كيف اللي تقيم المآتم اتكون

قالت ليها جنّه اتصير باچر

فاز اللي حضر منبر للحسين

تجاره اوحاز جنّه امن المتاجر

………………………………….

ابو مصطفى ال يوسف

1 رجب 1440 هـ

8 مارس 2019

……………………………………

وَعِيْت الدنيا وآنا بالإسم مكتوب

امي اتصير مريم ما عليها اخلاف

لكن من كبرت اقبالي شفت اليوم

زياده بالعدد امّين بالأوصاف

امي انضاف لسمي وخالتي بعدين

تالي من بعدهم لُم امين انضاف

عِدُّوهم ثلاث الامهات الحين

مريم زهرا شيخه بحسن الاوصاف

محظوظ ابزماني كنت انا محظوظ

وين القى ثلاث امن البشر اشراف

كلهن فيهن الطيبه وفيهن روح

امَيِّز كنت انا هالروح من آلاف

دَعْوَتْ الله يحرس لك شبابك روح

يحرس لك عمر يوليدي ما تنعاف

كاتب كل حچيهم بالقلب محفوظ

عن لا تنقرا كاتبها بالشفاف

انا طبعي احب منهم كلام الزين

ما خَلّي احد يقرا وظل خَوّاف

اسولف عن طبايعهم ونا مجبور

مثل طيبة قلبهم هالقلب ماشاف

اذا انظر صورهم ذكرياتي اتهيج

وسترجع حچيهم بالكلام اظراف

سَمْحات امهاتي ما يحبو الصيت

منعوتين دمهم امهاتي اخفاف

من زود الكرم عدهم مخازن جود

ولجود ابكرمهم يبني له مضياف

نامَوْ ولوساده تربه من لحسين

غطاهم كفن ولكفن صار الحاف

منسوجه لحفهم من عمل للخير

تتصدق ايديهم تبني هالاوقاف

نامو واستراحو من علل واهموم

خلونا ابذكرهم صارو الاسلاف

من بين الخلايق لو مشو آلاف

اعرف من عبيهم وسمة الاكتاف

مشيتهم ابهيده اوتنعرف للحين

بالسكه مشيهم يلزمو الاطراف

ما انسى شكلهم لمّا يبتسمون

كل صوره اليهم بالقلب تنضاف

كل كلمه ابحچيهم اكتب المقصود

لان قاموسهم اكتب به الاعراف

فقدناهم ابسرعه وعمرهم ما طال

حياة اشكد قصيره ولوقت سياف

موتتهم شفى صارت لهم هاليوم

ولعله صعيبه ولعمر ينعاف

ولمات ابمرض الله يعوضه ابخير

والرحمه اليهم تنكتب اضعاف

……………………………………

ابو مصطفى ال يوسف

1 رجب 1440 هـ

8 مارس2019