أرشيف القسم: الإمام الحسين عليه السلام

في دفن الاجساد الطاهرة بكربلاء بصيغة حوارية بين السيدة زينب والامام زين العابدين عليهما السلام

………………………………………..

زينب اتنادي علي ابهاذي المسيّه

جيَّتُك مغموم واحوالك شَجيّه

………………………………………..

(1)

وين كانت غيبتك يا قرّة العين

گلها رحت الكربلا الدفن الميامين

وانتي يا عمّه لَزَم بالكوفه تِبقيِن

اسمعي التفصيل يا عمّه عن احسين

وانتي عمّه عالِمه ابكل الرزيّه

………………………………………..

(2)

گلها يا عمّه الدفن سرُّ الايمه

الله آمر بالعجل ارجع يعمّه   

بالثلاثه ايّام لملاك ابمُهِمّه  

كل شِلو لحسين عند قبره تلمه

اتوزعت اشلائْهم فوق الوطيّه

………………………………………..

(3)

حكمت الباري جرت يِبقَو على البييد

وقوم اميّه عن دفِنْهم يبقَو ابعييد

والاملاك اتشيعه إييدن بعد اييد

دوحه ترجع كربلا واظلالها الغِيد

ويرتفع نعش الولي بالغاضريه 

………………………………………..

(4)

لو الف ثايه انْبَنَت يخفيها حاقد

بالسما موجوده ليهم هالمشاهد

بالأرُض بتشييد الشيعه المراقد

تنفتح تالي الزمن كل المنافد

وتنكشف طول الزمن فعلة اميّه

………………………………………..

(5)

اه ياعمّه اشكثر بقليبي جمره

كل جُرُح بحسين روحي ليها زفره

ودمعتي تنزل ابلوعه قطره قطره

والحزن بالصدر حَدِّه چنه شفره

قطعتني انّة احسين الشفيّه

………………………………………..

(6)

اشلون تبرد عمّه بقليبي المصايب

مرمرتني كربلا ابحد النوايب

صرْت اشوف الماي مصرع للحبايب

هَمْها ذوّب مهجتي والقلب ذايب

تدوي بقليبي حوافر لعوجيّه

………………………………………..

(7)

بانت آثار الخيم واتغيّر الحال  

چنها صارت من تحتها الارض زلزال

خيمه محترقه وخيمه فوق لرمال

خيمه ناشبها سهم وابثوب لطفال

واسمَع التله ابنفِس صوتچ دوِّيه

………………………………………..

ابو مصطفى ال يوسف

9 محرم 1442 هـ

29 أغسطس 2020

حال العقيلة بعد فقد الاهل والاحبة بطف كربلاء والمسير عنها.

……………………………………………

قتل احسين اذّاني .. درب الغربه ودّاني

باچر من يطر صبحه .. ليل الحادي بكره ايهون

……………………………………………

(1)

ليل الحادي بالآهات .. خيّم والحزن طبعه

واخواني على التربان .. كلهم بالفلا صرعى

يا ليل المآسي اشبيك .. صاحي وما الك ضجعه

يَمِّي اتبيّت الاكدار .. تسرق منّي الهجعه

حادي النوق قدّامي .. ابصوته يرعب ايتامي

ينادي النوق جابوها .. باچر للسبي تمشون

……………………………………………

(2)

كانت بالخيم لشبول .. كلهم حولي ملتمّه

يفدوني ابمهج ورواح .. ينادوني ابأدب عمّه

واليوم اختلف وضعي .. حولي اشگد زجر لَمّه

واحد سوطه ضَرْب امتون .. واحد ينفث ابْسَمَّه

واحد بالحقد سلّاب .. واحد حِقْدِه شَب اطناب

واحد بالحقد سبْني .. واحد بالبُغُض مشحون

……………………………………………

(3)

باچر نترك الاجساد .. عالرمضى بلا اموارى

كانت بالخيم تزهي .. وتسطع ذيك لگماره

شنّت بالحقد لسيوف .. فوق اصدورهم غاره

نور اوجوهم مخسوف .. دمهم فيض يتْجاره

ابعاشر زلزلو الحومه .. وصارَوْ عالترب نومه

بين الينزف اوريده .. وبين البصدر مطعون

……………………………………………

(4)

منظر حزّن الافلاك .. والكون انشحن بالهَم

كل جرح ابجسد لحسين .. سوّى بالسما مآتم

وابكل الدما السالت .. قلب المصطفى اتألم

نزلت للطفوف املاك .. ترفع كل تُرُب بالدم

يشتم تربته المختار .. يبكي والدمع مدرار

وابصدر النبي حنّات .. يسمعها جميع الكون

……………………………………………

(5)

اه اعلى الجرى ولصار .. ذوّب مهجة الزهرا

ما مثله جرى بالكون .. ولا بعده امر يجرى

جدّه المصطفى شافه .. خِنقّت قلبه العبره

وامّي الزهرا من لمصاب .. زادت بالضلع كسره

حسره والحسن ينظُر .. قلبه ابجمره متفطُّر

لمن شاف اخوه احسين .. صدره عالترب مطحون

……………………………………………

(6)

والحادي اطْلَعت شمسه .. عاد العاشر اتكرر

شفت احسين نحره ايسيل .. شفت امقطع الاكبر

شفت الطفل عبد الله .. داير وجهه للمنحر

شفت اشيوخ والشبان .. كل شي بيهم اتغيّر

شفت اعلى النهر عباس .. خويه لا چفوف وراس

شفت اجنود اميّه ابحال .. كلهم منِّه يرتعبون

……………………………………………

(7)

حال الحرم مدهوشه .. كل وحده لِها اروايه

وحده اتصيح يا عمّي .. جودك منْسُكب مايه

وحده اتصيح اه يبني .. واتحط يمّه الثايه

وسكنه اتروح يم عباس .. اتقبّل چفه والرايه

اتنادي عمّي يا مبرور .. يگل لُك كل طفل مشكور

ويرسل لك رسالة شوگ .. قلْبه اعليك ظل محزون

……………………………………………

(8)

اخر مشهد ابممشاي .. اخويه احسين ودّعته

تزهر حوله الاصحاب .. وحبيب الفرحه غامرته

وبعد اوداعي درت الشُّوف .. صوب النهر وجَّهته

روحه بالشريعه اطُّوف .. جودِه وروحه شايِلْتَه

قضَوْ بالطّف امانيهم .. ابحسره وشوگ اناديهم

ترى عن كربلا ماشين .. والحادي بلايّا اظعون

……………………………………………

(9)

دم احسين جاوبها .. اشوفچ وانتي اتشوفين

تشوفيني ابرسول الله .. وشوفچ امِّي من تبچين

وشوفچ بالسبي نهضه .. وصبرچ ينتصر للدين

وشوفچ للنبي ارساله .. مثل ما قال منّي احسين

وشوفچ يالعقيله اكتاب .. عنّا يشرح الاسباب

اصل التضحيه الاصلاح .. بالدم هالامر مقرون

……………………………………………

(10)

مجلس للحزن معقود .. لحسين ابزمن طه

جبريل اوحى للمحمود .. عن كربلا وبلواها

هلّت دمعه المختار .. تدري من تلقّاها

سرها ما انعرف لليوم .. الله ابرحمه اخفاها

اصل الدمعه بالسدره .. دمعه احجابها القدره

سر الفاجعه لليوم .. ويّا احسين ظل مدفون

……………………………………………

ابو مصطفى ال يوسف

8 محرم 1442 هـ  

28 أغسطس 2020

توصيف فاجعة كربلاء بلسان حال السيدة زينب عليها السلام

……………………………………………

جِيش الأميّه ما نفع بحصارُه

واحسِين ما تحصي الخلق زوّاره

……………………………………………

(1)

ليل المآسي اشكد حفر بضلوعي

فُرحت اميه من هميل ادموعي

تنزل عليَّه اهموم وقت اهجوعي

هَمِّي شجاوب امِّي يوم ارجوعي

قتْل الحسين اشگد صعب اكدارُه

……………………………………………

(2)

اوّل هزيمه بعد قتل احبابي

لمصاب بك يحسين صار اجوابي

حِزنَت امّيه من سواد احجابي

ظنّو خدرنا ينسلب بمصابي

يوم السبي قام الخدر بَدوارُه

……………………………………………

(3)

لحجاب آيه ونازِله اعلى الخِدّر

كل هاشميّه اتمسكّت بالمصدر

خدر الرساله ابكربلا ما اتْغَيّر

ما ترضى ذله وبالخُدر تتستّر

لحجاب واجب وابشرُعنا إقراره

……………………………………………

(4)

حانت صلاتي واعتليت التله

والتل فرشته يا احسين امصلى

صوت الاذان ابيا حسين اتعلى

صوب النحر دارت تصلي القبله

للقبله حجّت واعتنت لزياره

……………………………………………

(5)

وسط المخيم كنت اسولف اوياك

يحسين ترجع وشگثر نترجاك

من دمعتك لفراگ لاح ابعيناك

ظليت بعدك صابره بين اعداك

وابصبري بان اعلى العدو انكساره

……………………………………………

(6)

احروف الدعا بچفوفي تنقرا احسين

صوت النحر تسمع اذانه الكونين

واتقبّل الله ابكربلا القرابين

واستبدل الله ابكل اميّه امحبين

قتلُك شَعَل قلب المحب اجماره

……………………………………………

(7)

مريت صوب اجسادكم بالحومه

وابعيني حسره وبالقلب مهمومه

مشهد فجعني اعلى الصدر بدمومه

رض الحوافر عالجسد مرسومه

منظر صعب اكشف يخويه اسراره

……………………………………………

(8)

عباس اتذكر يخويه اعهودك

اتذكر الماي اشحلاته ابجودك

عيني تنام اشگد امان اوجودك

اوداعك قتلني قبل قطْع ازنودك

بعدك زماني ينقلب بخطاره

……………………………………………

(9)

عباس بعدك عيشتي ابهضيمه

ومشي ابيسُر ومشي بعد اليمه

ارعى اليتيم ارعى بعد لِيْتِيمه

ورعى الامام ابعلته ابلا خيمه

ينشدني عمّه اشهالصبر مقداره

……………………………………………

(10)

صوت الطفل عبد الله ما يبرحني

ليلة الحادي طيفه من ينشدني

يا عمّه شوفي حرمله ويذبحني

رغم العطش واصياحي ما يرحمني

دمّي يبويه امن النحر يتْجاره

……………………………………………

(11)

لحظه اوقفِت صوب الجسد لمبضع

لكبر اقبالي وصله وصله امقطع

قلبي انفجع وابعيني دم المدمع

لله در احسين وقت المصرع

ابني امقطّع بالحقد واشفاره

……………………………………………

(12)

مطروح شاب وچنّه عودِه خضره

وجهه قمر لكن ابراسه الطبره

وادمومه عالوجنه بقت متخثره

رمله اعرفت جاسم وزادت حسره

نزف الدما ابوجهه خسف انواره

……………………………………………

(13)

جت لي المصايب كلَّها ابرزيه

صوبني دهري وجار هم عليّه

قوسه رماني ابكل سهم ماذيّه

كل ساعه تسألني يخويه ارقيه

احسين بويه عمّه ويش اخباره

……………………………………………

(14)

هاللي جرى ابيوم الرزيه ابعاشور

الله خلق له شيعه تلطم لصدور

كانت اراضي كربلا كلها ابرور

عُمرت مساجد شيعتك عُمْرت دور

للمهدي تنطر عن ظهوره ابشاره

……………………………………………

(15)

دمّك جرى ولليوم احمر لونه

لليوم تبكي شيعتك محزونه

نسجت علم وابقبتك رُفْعونِه

لونه بِمْحَرّم اسود ايخلونه

بمحرم العالم يِشد اسفاره

……………………………………………

ابو مصطفى ال يوسف

4 محرم 1442 هـ

 24أغسطس 2020

في استشهاد الامام الحسين عليه السلام وتوصيف اهداف النهضة الحسينية

………………………………………….

يحسين مكتوب .. لدروب .. كلها امعَطَّله

تسعي لك اطّوف .. لرواح .. كلها ابكربلا

………………………………………….

(1)

يحسين عاندنا الدهر بك يمتِحِنّا

سد عشرة الابواب خلانا ابمحنّه

تدري المجالس بالمحرم ليها انّه

وابعشرة الايام تفتح لينا جنّه

والجنّه بتعود .. بقيود .. عنّا امقفله

تسعي لك اطّوف .. لرواح .. كلها ابكربلا

………………………………………….

(2)

ونّة المنبر ليها رنه ابدمعة العين

دمعة العاشر من نفِس دمعة العشرين

تشفي الصدر نغمة حِزن صوت المحبين

والدمعه تنزل عالوجِن بحسين يحسين

من حُكُمْ لدموع .. مشروع .. لجلُك نهمله

تِسْعِي لُكْ اطّوف .. لرواح .. كلها ابكربلا

………………………………………….

(3)

الله امتحن كل البشر رحمه ابعبادِه

بچَّانا لَجلُك يا الولي ابيوم الولاده

لليوم نبكي اعلى الجرى برض الشهاده

واللي بَكى نال الاجر ادّى العباده

والشيعي مفطور .. محظور .. نار اتوصِّلَه

تِسْعِي لُكْ اطّوف .. لرواح .. كلها ابكربلا

………………………………………….

(4)

عاشور شهر امن الحِزِن ينفجر بركان

يِنْثُر الرحمه للمُحِب للطاغي طوفان

لو ينفتِح قلب المحِب متمرمر احزان

مكتوبه في وسط القلب لحسين عطشان

وليحيي عاشور .. مذخور .. رحمه تشمَلَه

تِسْعِي لُكْ اطّوف .. لرواح .. كلها ابكربلا

………………………………………….

(5)

لحسين مو قصة ابدمع والكل يقيسه

والدمعه بحسين اصبحت ذرّه نفيسه

وِلْـمَا بَچى اعلى احسين شيطانه جليسه

وناب الجهَل شيطان يصبح له فريسه

والرحمه بحسين .. بالعين .. دمعه نازله

تِسْعِي لُكْ اطّوف .. لرواح .. كلها ابكربلا

………………………………………….

(6)

كل من تعنّى احسين خلّى الجنّه دارَه

باع النفِس تالي اشترى ابلايّا خسارَه

في احسين باذل مهجته ليله ونهارَه

رابُح الدنيا وآخره ابهاذي التجارَه

يالِيِتْنا اهناك .. ويّاك .. يوم المرجله

تِسْعِي لُكْ اطّوف .. لرواح .. كلها ابكربلا

………………………………………….

(7)

كافي البعُد يبن النبي والمشهد ابعيد

واليوم مجلسنا الحسيني قيّد الإييد

والمصلحه يا سيدي بغيابنا اتريد

لابد شروطك نِتِّبِع والفتوى تقليد

وابأمْرُك اغْياب .. والباب .. بييدك قَفِّلَه

تِسْعِي لُكْ اطّوف .. لرواح .. كلها ابكربلا

………………………………………….

(8)

منبر امحرم مو سهل كل من يديره

وليرتقيه امهمته كلش خطيره

لازم يحوز المعرفه اعلومه غزيره

وتشهد له اصحاب الفضيله والخبيره

والمنبر اقلام .. إعلام .. يهدي الجاهِلَه

تِسْعِي لُكْ اطّوف .. لرواح .. كلها ابكربلا

………………………………………….

(9)

لحسين يزخر منبره ابكل الثقافات

واتذوب عند احسين كل الاختلافات

لدوار كلها اموزعه ابنفس المسافات

دور الخطيب ايتممه الرادود شيلات

واتعزي شيلات .. آهات .. تلطم معوله

تِسْعِي لُكْ اطّوف .. لرواح .. كلها ابكربلا

………………………………………….

(10)

نهضة امحرم وضّحت اصل القضيه

فيها انتصر لحسين وانهزمت اميّه

والدين شمسه للسما ارتفعت سويّه

دم الشهاده بس بقى بالغاضريّه

وابدمه قرآن .. شريان .. يروي البسمله

تِسْعِي لُكْ اطّوف .. لرواح .. كلها ابكربلا

………………………………………….

(11)

واحسين للاسلام من قدّم قرابين

دور العباده من دمِه تقرا القرآئين

قول النبي امن احسين اكَّدْها ابَّرَاهين

يوم انتشر دين النبي ابكل البلادين

للدين قنديل .. جبريل .. بسمُك يشعله

تِسْعِي لُكْ اطّوف .. لرواح .. كلها ابكربلا

………………………………………….

ابو مصطفى ال يوسف

24 ذو الحجة 1441 هـ

14 أغسطس 2020

في وقوف الامام الحسين عليه السلام.

المقاطع: مفاعيلن فعولن .. مفاعيلن مفا

الكراسي: مفاعيلن فعولن .. مفاعيلن فعولن

القفلة : مفاعيلن فعولن .. مفاعيلن مفاع

…………………………………………..

بين الظهر والليل .. تحته وقْفَت الخيل

من وَقْفَت جواده .. علامات الحصار

…………………………………………..

(1)

مَشى ظعن الرساله .. على درب المحن

علامات المنايا .. مشت خلف الظعن

تمشي ابهون بالبييد .. على بعد الوطن

وزينب ليها لچفون .. ليالي ما غُفَن

بالهيبه مشيهم .. يتقدم وليهم

ظعن الفاطميّه .. مَيِعْرُف لنكسار

……………………………………………

(2)

ظعن احسين قدّام .. والحر يتبعه

ضيّّق دَرُب لِظعون .. وصارت جعجعه

لله استرجع احسين .. وزينب تسمعه

تقلِّه اشسبب لسيوف .. علينا امشرّعه

گلها كاتبوني .. كلهم ينشدوني

واعيون العساكر .. يِبان اعليها ثار

……………………………………………

(3)

زينب ويّا عباس .. تِعيش امدللا

يگِلْها ابعيني والرّوح .. تِگِلِّه يا هلا

كل ساعه تِنِزلين .. بَـنَخِّي الراحله

وننزل كلنا هاليوم .. براضي كربلا

يختي من شِيَمْنا .. بس خدرچ يهمنا

وحدودك خطيره .. علامتها الفَقَار

……………………………………………

(4)

وقَّف مُهر لِحسين .. يِعْلِن وقفته

حثّه احسين من شاف .. نهاية خطوته

راده يمشي خطوات .. تِعَذّر مشيته

نادى ابأهله والقوم .. حزينه نبرته

نَِزْلـُو الهاشميات .. برض الغاضريات

مكان ارض الشهاده .. من الله لِخْتيار

……………………………………………

(5)

حط ابهالفلا احسين .. خواته واخْوِتَه

احْدُود الخِيَم عبّاس .. رسمها ابيمنته

يَمْ خدر العقيله .. نَصَبها خيمته

بين الخدر واحسين .. ترفرف رايته

وابهيبة علمهم .. يِحرس كل خيمهم

زينب عين لحسين .. وعين اعلى الصغار

……………………………………………

(6)

عليهم هوّد الليل .. براضي نينوى

جت زينب للحسين .. وحَمّال اللِّوى

باچر نمشي لا وين .. اذا بان الضوى

گلْها يختي صبرين .. شهادتنا سوى

وانتي ابهالمصايب .. تبچين الحبايب

واتْرِدِّي وحيده .. يزينب للديار

……………………………………………

(7)

عنّا من تروحين .. على درب اليِسُر

عينچ يختي متنام .. يخاويچ السهر

امُّ التضحيه انتين .. وانتي ام الصبر

للكوفه تطبّين .. يعاديچ الدهر

بوقوف الدواوين .. حتمن تنصري الدين

كلهم تهزميهم .. ابْوَقْفَة لِنْتِصار

……………………………………………

ابو مصطفى ال يوسف

12 ذو القعدة 1441 هـ

3 يونيو 2020