أرشيف القسم: رثاء

في النهضة الحسينية المباركة، سلام الله على ابي عبدالله الحسين عليه السلام

…………………………………………….

نُعْرفُك بن فاطمه ولمصطفى

وبن حيدر وبن زمزمم والصفا

…………………………………………….

(1)

يا احسين النهضه ظلّت للخلود

منبر الاسلام من عِدْهَا يِعُود

تكتب التاريخ من وحي الجدود

تِمْسح انواع الجهل من هالوجود

والشِّعار الْكُم سلام   …  رايتك يَبْن الكرام

صار للاسلام بُوْجُودُك صِفَه

…………………………………………….

(2)

كربلا ارض الهدايه والسلام

تربه فيها ينتصر دم الامام

ينهزم سيف الضلاله والظلام

يِصْحى صُبْح الدين والذِّله تِنَام

شوف زاير كربلا  …  بالملايين الملا

تُرْخَص الارواح لِيها زاحفه

…………………………………………….

(3)

صدّق المعبود بالرؤيا الخليل

خلّى لِه اسماعيل وِلْكبش البديل

من محمد راد بارينا الدليل

لِلْحسين اخْتار بَس يُرضَي الجليل

بكَّى سكان السما  … من بكت له فاطمه

من بَچِي الزهرا اخذنا العاطفه

…………………………………………….

(4)

لا مثيل الكربلا ابكل الزمان

من وجود احسين مِتْسَمّي المكان

تربه منها الكون معجون اعتجان

تُربه تِبْني كل مناره للأذان

كل مريض الله ابتلاه  …  احسين بالتربه شفاه

سر عجيب ابكربلا صَعْب اوصُفَه

…………………………………………….

(5)

سر عجيب ابكربلا سرها عجيب

شَمْسَها تِشرُق ولا تُعْرف مغيب

وِلْمُحِب لحْسين دمْعَاته نحيب

دَمْعَه مخْلوقه على حُب الغريب

من عيون المؤمنين  …  تنزل الدمعه ابحسين

دون هالدَّمْعه على الدنيا العفا

…………………………………………….

(6)

وابْلِسان الحال لحسين النعي

كعبه فيها كربلا مَحْلَى السعي

بين تل الزينبيه اوموضعي

ابدون عباس المدينه تِرْجَعي

هالنعي اول كلام  …  منطق السان الامام

وَضَّح العباس زينب موقفه

…………………………………………….

(7)

ترحلي ابركب السبي يَمّ الصبر

تنشري الاسلام وِبْدَرب اليسر

ينتشر لِسلام كل شُبْر ابْشُبُر

ولأثر بالشام خَلّوْ لِچ قبُر

تِنْسج الشيعه سِتَار  …  تنتشر حُول المزار

اقْلُوب مفْطوره على الحب والوِفَا

…………………………………………….

(8)

يا احسين ابْغُرْبَتي لَحْيِي المصاب

لَدْخِل الكوفه وَبَدِّي الانقلاب

وَهْدم اقْصُور الدّعي وابْن الضَبَاب

مِنْ ظَلَم لِحسين يِتْلَقّى العذاب

ولأَمَانَه ما تضيع .. اييِه وحق طفل الرضيع

لَنْدُبُك وسْط المجالس واقِفَه

…………………………………………….

(9)

لَقْسِم ابحق الوَلي وجدّي الرسول

بالحسَن لَقْسِم وحق امي البتول

لازم اركان الجهل بالحق تِزُول

لِلشّنِيعَه افْعَالهم بَكْتِب فصول

اوّل افْصُول الكتاب  …  تِلْقَى مَكْتُوب الجواب

سَفُك دم احْسين شُمْر ابْمَرْهَفَه

…………………………………………….

(10)

لمت الاطفال والعالم سكوت

قوم اميّه ظنّت ابزينب تموت

صلّت اتادي دعاها بالقنوت

هالدعا لليوم في كل البيوت

وِهْيّه تِدْمي المقلتين  …  يالثارات الحسين

اقلوبنا وياچ زينب عاكفه

…………………………………………….

ابو مصطفى ال يوسف

25  شعبان 1440 هـ

30  ابريل 2019

اضافة مقاطع 8 الى 10

محرم 1441 هـ

اغسطس 2019

حوارية السيدة زينب مع والدها امير المؤمنين عليهما السلام

………………………………..

من ارض المصيه .. زينب تنتخي به

تنادي اليوم زينب هالمسيّه .. حيدر يحيدر

………………………………..

(1)

مثل هالليل ما ظنّي سهرته

نحيب ايتام بالخيمه سمعته

يحيدر يا علي هاليتم رِدْتَه

مثل كِل الْيِتِم بيدك مسحته

وُعْذُرني يبُوُيه .. مثكوله بخويه

وقضي الليل برض الغاضريه .. حيدر يحيدر

………………………………..

(2)

يمِن هاشم لها عزها اوفخرها

يبو الشِدّات كل شِدّه اتحضرها

بناتك تنتخي بك مِن زجُرها

كلها ابكربلا الحادي اسَرْها

وينك يبو الشده .. والظالم تعدّه

يزجرها ويدبها امن المطيّه .. حيدر يحيدر

………………………………..

(3)

يخدمني البطل من جينا عباس

شايلني ابفخر خويه على الراس

يمشي ابمحملي واتهابْنِي الناس

شبان الهواشم ليّه حرّاس

ظلّوْ يمشو بهداي .. ولعباس بحدَاي

من يسمع كلامي ايرد عليّه .. حيدر يحيدر

………………………………..

(4)

يسمعها علي اودمعاته تجري

تِمَنِّيت انقضى اولا طال عمري

بعد احسين گِل لي اشحال صبري

وُصْلَت نارهم لحدود خدري

المن نلتجي وين .. والخيمه بلا احسين

وصحابه على حر الوطيّه .. حيدر يحيدر

………………………………..

(5)

زماني ظل يعاديني ابسهامه

صوبها على اخواني النشامه

علّى الصوت بالذله كلامه

لوّى السوط بمتون اليتامه

سوطه ضرب متني ..ولسانه جرحني

يگلْ لِي وابشماته الخارجيه .. حيدر يحيدر

………………………………..

(6)

لفاني الليل من دون الليالي

صرعى اعلى الفلا ظلّت ارجالي

وآني ابحال تعلم بويه حالي

تُعْصُر لِي القلب دهشة اطفالي

هذا الليل جاني .. موحش من لفاني

لا حد من هلي ايحامي عليّه .. حيدر يحيدر

………………………………..

(7)

لسان الحال بختم هالقصيده

ضمها المرتضى ابحاله شديده

صاح ابآه يطلبها المجيده

يابنتي الصبر منّچ اريده

هذا كله شِفتَه .. من جَدِّچ عرَفْتَه

يگلْ لِي زينبك تصبح سبيّه .. حيدر يحيدر

………………………………..

ابو مصطفى ال يوسف

20 شوال 1440 هـ

23 يونيو 2019

في حق الامام الحسين عليه السلام بيوم العاشر من محرم الحرام

……………………………………….

يوم عاشر سال دم المصطفى

سال دم احسين واهله الطاهرين

الطم اعلى الصدر نادي ياحسين

الطم اعلى الصدر نادي ياحسين

……………………………………….

اه يا مهجة الزهرا اوحيدرا

يوم عاشر ذاب فيه المهجتين

ضجت الافلاك من سابع سما

واعتلى جبريل صوته الخافقين

من وصل صوته الى اعنان السما

نزلت الاملاك بالدمع الحزين

نزلت اتأدي التعازي للنبي

والحزن دامي دموع المقلتين

سال دم القربى في وقت الصلاة

سال دم احسين بييد المارقين

وانسجن عدل السما بييد الطغاة

من قَتِل لحسين صار اول رهين

من خطب في القوم سبط المصطفى

سكّرَو آذانهم بالاصبعين

ارجعو لنسابكم وحسابَكم

وانسبوني من انا يا مسلمين

جدي المختار وامي فاطمه

والدي حيدر امير المؤمنين

تستحلو قتلي ما جُرمي اذن

ايُ ذنبن ايُ عرفن ايُ دِين

عز على الحورا تشاهد مصرعه

والشمر ينهرها لا تتقربين

والعقيله ابسوط يضربها اويقول

لضربه بالسيف وانتي تنظرين

فوق صدر الانبيا لمن صعد

جمَع كل اذنوب قوم الآثمين

هبّر اوداج الامام اومنحره

قطَع راس احسين بالحقد الدفين

رفع راس احسين بالرمح الطويل

رتلت لايات منّه الشفتين

بان للحجاج قربان الهدى

مكه صارت تنتحب والمروتين

حول جسم احسين دارت للطواف

لعوجيه ابخيل عشره مرتين

بين تل الزينبيه اومصرعه

صار للمسعى حدود التلتين

والحَرَم يحمي الخيم ويا الخدور

حلّو احرام الخدر قوم اللعين

واعتلت بالكون صرخت جبرائيل

والصدى اتعدى السماوات اجمعين

صيحته يحسين سمعتها الملا

كلهم اعلى احسين ظلّو لاطمين

حِزْنت الانوار نادت بالسما

يا شمس لا تغربي اولا تشرقين

اتكدرت لنجوم واحتلها الظلام

ولقمر وياها ظلَّوْ ساكتين

اتزلزلت كل كربلا لمّن دنى

موكب الزهرا علا منّه الانين

حنّت الزهرا ابلوعات الحزن

يابتوله شالسبب تسترجعين

قالت ابضلعي اثر ما ينجبر

والسبب عبد الله مقطوع الوتين

دمعتي اعلى احسين ما توقف ابد

غير يوم الشيعه تحيي الاربعين

خاطري والشيعه بيهم ينجبر

يوم تهتف يا لثارات الحسين

……………………………………….

ابو مصطفى ال يوسف

25 ذو القعدة 1440 هـ

26 اغسطس 2019

يوم العاشر من محرم

……………………………………….

كربلا ارض المصايب

فيها قلب الزهرا ذايب

وابأمُر زين العباد .. كربلا تِلْبَس سَوّاد

……………………………………….

(1)

احسين من ودع خواته .. ضمته زينب

بالنحر ظلت تشمه .. والصدر مطلب

خويه وصتني الزچيه .. امرها اتوجَّب

قال يازينب اخبرچ .. والخبر اصعب

خيّه سِمْعِيها جوابي

هذا فعل ابن الضبابي

ضمت احسين الملاد .. كربلا تِلْبَس سَوّاد

………………………………………..

(2)

اخر اوداعه الاحبه .. نادى بالاصحاب

كلهم اعلى القاع صرعى .. بين شيب اوشاب

صاحب الهيبه العظيمه .. يدري بالاسباب

راد من نادى عليهم .. يبچي عالاحباب

بچى لقلوب التسمعه

وصبحت للشيعه دمعه

ترفع السبع الشداد .. كربلا تِلْبَس سَوّاد

……………………………………….

(3)

راد يحمل عالمعسكر .. نادى ابعياله

حاطته كل الفواطم .. وقفت اقباله

ينظر الزينب وسطهم .. والدمع ساله

من يقدم لي جوادي .. والندى جى له

درب خويه للشهاده

زينب اتقدم جواده

مسكت اعنان الجواد .. كربلا تِلْبَس سَوّاد

……………………………………….

(4)

من مشى خطوه ابجواده .. زينب احتارت

رفعت ايْدِيها تسلم .. خلفه من سارت

لزمت استار المخيم .. عنه واتوارت

من بعد امر الكفاله .. بالمحن صارت

من لفت للخيمه تسمع

بالعليل اوعينه تدمَع

من دعاه صار الجهاد .. كربلا تِلْبَس سَوّاد

……………………………………….

(5)

ثارت اعلى الناس غبْرَه .. والفلك اظلم

حلّت اعلى الوادي غيمه .. احمر امن الدم

لنه ابو السجاد طايح .. بالظما اتألم

صار بالعالَم سواده .. عاشر امحرم

صوته من يقسم يجدي

بالعطش مفطوره چبدي

والعطش لظى الفؤاد .. كربلا تِلْبَس سَوّاد

……………………………………….

(6)

بالظليمه بالظليمه .. جيت للخيمه

المن ابهذي الرساله .. الخبر تسليمه

تطلب اخدور الفواطم .. للعزا اتقيمه

هالخبر يا مهر يصعب .. ليها تعميمه

للبقيع الصرخه راحت

يا حُسين الزهرا صاحت

تعلن الزهرا حداد .. كربلا تِلْبَس سَوّاد

……………………………………….

(7)

زينب اتنادي ادركنا .. يرجع اتريده

سمعت القوم ابهلاهل .. ضجت البيده

والشمر فوق الشفيه .. سيفه ابإيده

يضرب الوالي اعلى نحره .. قطع اوريده

من صعد شمر اعلى صدره

بثنعش ضربه اعلى نحره

وابأمُر زين العباد .. كربلا تِلْبَس سَوّاد

……………………………………….

(8)

شال راس احسين بييده .. عالرمح علّاه

واعْتَلى صُوت الشفايف .. تقرا بسم الله

ضجت ارض الغاضريه .. اورتلت وياه

صُرْخَت الاملاك كلها .. آه واويلاه

آية الْكَهْف المبينه

بَكَّت اقْلوب الحزينه

من بعد موت العماد .. كربلا تِلْبَس سَوّاد

……………………………………….

(9)

كربلا تخفي مآسي .. وشكثر اسرار

ما انكشف لليوم منها .. مايجي المعشار

بالخيم آل النبوه .. اتعرضت لخطار

طِلْعَت اتنخي وتنادي .. ابيا علي الكرار

ياعلي مِنْ سَلَّبُونا

يَمْنَا لا امنا وَبُونا

سَلَّبُونا باطَّهَاد .. .. كربلا تِلْبَس سَوّاد

……………………………………….

(10)

والحزن من نوح زينب .. صار تشريعه

وانبنت لقبور كلها .. ابدمعة الشيعه

عاشر ابعاشور حضرت .. تحيي توديعه

وسط قلب الشيعه نعشه .. صار تشييعه

شهر لمحرم ولاده

صارت النا اليوم عاده

كل محرم باعتياد .. كربلا تِلْبَس سَوّاد

……………………………………….

(11)

اتالم العالم ابموقف .. صار للمظلوم

يوم طفله ابليل حادي .. وصلت للقوم

تنشد السلاب طلبه .. غاب عنها النوم

وَصّلت يَمِّه اوحضنها .. اوصاح ياقيوم

طُفُل مَذبوح ابْجُواري

طُفله هامت بِالْبَرارِي

جَاوَبُه رَبْ العِباد .. كربلا تِلْبَس سَوّاد

……………………………………….

ابو مصطفى ال يوسف

1 محرم 1440 هـ

10 سبتمبر 2018

……………………………………….

الاضافة من 8 الى 11

2 محرم 1441 هـ

2 سبتمبر 2019