أرشيفات المؤلف: محمد آل يوسف

………………………………………

في رحيل امنا الغالية المؤمنة الصابرة الطيبة الحنونة ام امين رحمها الله بواسع رحمته. حشرها الله مع محمد وآل محمد صلى الله عليهم احمعين. اللتي انتقلت الى جوار ربها في يوم 25 فبراير 2019 الموافق 20 جمادى الاخره 1440 هـ.

………………………………………

قل لي يا ليل الثلاثا اشحل عليك

تسرع ابلحباب تاخذها ابغدر

تمشي تتخفى ابظلامك ليش عاد

عادتك ياليل تهوى انت اليِسُر

اتمسحَت لِبْست حجاب العارفات

چنها تدري الليله اخر هالعمر

وانت من حلّيت علّينا الاذان

كبّرَت صَلّت دعَت امْنا الطهُر

كمّلت فرض النوافل والصلاة

جلست اتسبح بناملها اشكثر

صوتها ابذكر السور چنه دعاء

تقرا تجهر والجهر بحلى ذكر

مسبحتها تعرف اتصلي الصلاة

حتى صوت المسبحه ايصلي جهُر

من ابونا راح فارقنا الحياة

صرنا بيها انلوذ وانشد الظَهُر

بالمرض عاشت على طول السنين

ماشكت لحظه وتعلِمنا الصبر

تضحك ابوجه الكبير اويا الصغير

وهْيَه وجعانه وتدوس اعلى الجمر

نعم كانت خيمه وابحجم الحياة

من نفَسْها انعيش وانشم العطر

ما يمر يوم ابعمرها ابلا سؤال

عودتنا اليوم ولكل ينتظر

قلنا يمكن بدّلت حال السؤال

بدل ما تسأل علينا اهيه تُمر

عدّت الساعات واتعدى النهار

عينا اعلى الباب تنظر للأمُر

اتأخرت امنا ولا بين جواب

ولخبر جيتها لينا منتشُر

قلنا جيتها قريبه امنا اكيد

بابنا المفتوح من وقت الفجر

تالي نسمع طاحت امبعد الصلاه

بعد ما جلست اوحست شي عسُر

قالت اولادي احس قلبي ضعيف

وحس ضيقه الماسكه وسط الصدر

جيت اسندها ورد ليها الحياه

لكن ابحاله شفتها تحتضر

غابت الانفاس سكتت للجميع

ظلت العبرات من عدنا تذر

قعدي يمه توها عالروحه تصير

من يجي لنهار وضعچ يستقُر

كلّنا نفديچ وانريدچ ملاذ

درب تالي الليل يايمه خطُر

طَلْعَت امنا قلنا هم لينا تعود

لنها متعوده اوهذا ما يضُر

امنا حبها لينا من قلب العليل

خوفها اعلينا قلبها ينفطُر

حاول الدكتور يقنعنا ويقول

صعبه تشفى والقلب يضْمَر ضَمُر

لكن الاحوال شخَّصْها الطبيب

من فتح قلب الحبيبه يعتذر

وصفته لقليبها كلش سليم

منتعش بالحب قلبها اومستمر

مؤمنه والزهرا مولدها الدليل

سافرت والليل شع ليها بدُر

تلتقي بالزهرا في يوم الممات

طالبه الزهرا تحقق هالنذر

شَرّبتها من ضيافتها البتول

من سقتها الماي ولكوثر نهُر

مولد الزهرا فَرَح للمؤمنين

خاطر اللي مات لابد ينجبر

هاذي بس كانت هديه اومو كثير

من خدم للزهرا ذنبه ينغفُر

كيف بمنا واهيه تحضُر للبتول

كل مآتمها ابدمعها المنهمُر

ظنتي هذا قسم للزهرا صار

يَمْ امين اتجين واحنا ننتظر

شيعتي وياي تعطيچ الورود

وآني بعطيچ الامان امن القبُر

………………………………………

ابو مصطفى ال يوسف

22 جمادى الثانية 1440 هـ

27 فبراير 2019

مرثيه في حق المرحومة ابنة العمه الغالية ام بليغ رحمها الله بواسع رحمته واسكنها فسيح جنته
……………………………………….
العيله من تدري اجت ليها ام بليغ
قامت الها وبالتحيه امشرِّفَه

من تجي يكبر ابجيتها المكان
من تسولف بس حچيها انسولفه

على العاده اجيّن ماتم للحسين
تبچي للزهرا ودموعچ نازفه

بس مكانچ صار بالمجلس حزين
صارت الزهرا ابمكانچ واقفه

زهره بين اورود خلاها الذبول
نايمه اعلى اغصان ظلت ناشفه

ام بليغ اليوم من يسأل عليچ
قالو مشوار الدواها تصرفه

قلنا ننطر ترجع الطّيْبَه اكيد
حالها ترجع ولينا توصفه

طالت الغيبه ولا بين جواب
خلّت اقلوب التحبها خايفه

صرنا نتخيل صورها والكلام
صوتها ابنبره حنونه نعرفه

لكن الاخبار حرفتها الرياح
كل خبر عنها ابسلامه تعصفه

خبر جانا ابصوت ينعاها ام بليغ
نورها بالبيت ياوسفه انطفى

كنتي مثل الوطن لولادج كبير
عنّه غبتي ابغيبتچ من يِخْلِفَه

سمعي اولادج يطلبونچ جواب
وانتي ما غيرچ يزهرا اليعرفه

تقدري يمّه تمهلين الطريق
ترجعي لينا ابلحظه خاطفه

الله كاتب هالعمر يقضي بعيد
لمّا خلّص قال عالدنيا العفى

ليش عجلتي قرارچ بالرحيل
قالت العله ابحياتي امصرّفَه

قلت اسافر يمكن ابغربه اطيب
والرحيل ابعلتي ظنّي اختفى

قدمت عذري على اخر رحيل
عذري لمن له حچيته مكتفى

قال لمقدر يسافر كل خليل
قِلِت ارحل لكن اشگد اسفه

ادري مو بيدي اقرر هالرحيل
لكن احساسي تدفعه العاطفه

ادري سببت المواجع والدموع
لغلى ناس ابدنيتي والطايفه

من معينچ ترتوي ادموع الفراق
من بحر لدموع لجلچ غارفه

زهره ليش اليوم خاويتي الرحيل
حالة اولادج ابروحچ شايفه

غبتي يا ام التواضع والفعال
تحچي عنّچ كل فعالچ منصفه

طيبتچ تكفي القصيده والمعان
طيبتچ ويّا القصيده والفه

من حجابچ ظلّت ابيتج عباة
بيتچ اتزين وصارت متحفِه

قلبچ ابيض ظل يشع بالدرب نور
والظلام ان كان كالح يكشفه

بالسلامه امواليه اوعندچ ضمان
تدخلي الجنه تلاقي المصطفى

اوصفي الجنه اذا انكلف عليچ
ندري بالجنه تصيري عاكفه

جنه وسعه والدرب ليها جميل
مروه كنت اسعى عليها والصفى

عله ما بيّه ولا اشكي طبيب
زيارة اهل البيت صارت لي شفى

والضوا حولي مشاعل كلها نور
جيت اعدها ارباتعش متكاتفه

واللحد ما ظل يعَفّيه التراب
كل عمل للخير يبني ويجرفه

من يجي شعبان حفوني ورود
كل لحد يمّي يقيم الناصفه

والطيور اللي تشوفوها تطير
هاذي ارواح ابجنحها امرفرفه

من تحوم اتريد تنشد من بعيد
بالولايه وحب علي ليّه اقتفى

……………………………………….
ابو مصطفى ال يوسف
3  شعبان 1439 هـ
19  ابريل 2018

في رحيل ابنت العمة المؤمنه الصابره ام بليغ رحمها الله بواسع رحمته واسكنها الفسيح من جنته.

……………………………….

رِدِت اكتب قصه عنّچ يم بليغ

كانت ابفكري المعاني امحيره

قلت كتبو لي فقط عنها حروف

بس رؤوس اقلام هم مختصره

وآنا تالي برسم احدود المقال

او قصيده بالمعاني امعبِرَه

وابلسان الحال لولادچ اقول

سمعو منّي هالاوصاف الوافره

باب لُمْنَا يا حبايب درفتين

درفه مفتوحه اودرفه امسكره

درفة المفتوحه عنوان الكريم

درفة المصكوكه يعني امستره

درفة إللي امسكره تعني العفاف

لنها مثل احجاب لمنا صايره

بابها ما تغلقه لَنْ باب جود

بيتها امن الجود ديره عامره

أُمْنَا قصه للصبر فيها دروس

والصبر بس يعرفه من يشعره

لو رسمنا القصه بحجام الحياة

قصة امنا من صغرها امكبره

اتعلمت من سيرة الزهرا حجاب

ما تبيعه لو ذهب به ينشرى

من صغرها اتيتمت فُقْدت كفيل

عَبِد للمحسن ابوها المفخره

اذكر ابّيت الذي ضمها زمان

عالخوات اهيّه عليهم ساهره

واليتم قاسي ولا يفهم صغير

عاشت ايام الطفول اتحاوره

لكن أُمْنَا من صغر يحچي الزمان

تمسك ابخاطر يتيمه واتجبره

من احد يغتاب ما ترضى ام بليغ

مجلس الغيبه تعوفه اوتهجره

أُمْنَا خلّت كل وقتها للوضوء

ما اينام الليل قبل اطَّهُرَه

قبل ما ايأذن اتهيِئ للصلاة

نور تزهر باللباس امْخَدّره

من تصلي تنتحب عند السجود

من سجود امْنَا عرفنا المغفره

من نصايحها البچي بس للحسين

والحسين ابكل زياره اتْصَوَّرَه

اجر منّ ادموعكم تجري عليه

ما اظن كل الملايك تُحْصرَه

اربعة ايّام آمرها الطبيب

صايمه اويصعب امر له تكسره

رادت اتكلمنا عن منظر عجيب

لكن انفاس الهوا بالحنجره

اشرّت واعطيتها باليمنى اييد

كتبته ابجوال جمله امسطره

شفت لمن مرروني بالسرير

ماي وآني بالعطش متأثره

دمعة اعيوني على ذكر الحسين

مات ظامي والچبد متفطره

صار ويّا احسين بالغربه حوار

سألته نقدر سفرنا انأخره

قال ليها الزاد عندچ للمسير

بالطريق الخدمه لچ متوفره

وانتي بزياره قصدتيني بعيد

وآنا هم بزياره قبرچ لحضره

رابطه اللي بينها وبين الحسين

تربه بمصلاها دوم امعطره

وصّت ابقاع اللحد لمّن انام

اغبار للتربه ابقبرها ننثره

خبّريني الحال يسألها الطبيب

تحمد الله ابحالها من تخبره

بالمرض الله حباها الامتحان

والمرض امنا ابدعاها اتصبره

والشفا امن الله طلبها مو محال

اتبسمت لمن عطاها الاخره

على افراش العله تلهج بالدعاء

كل دعاها تحمد الله وتشكره

شدّة الآلام صلتها ابصلاة

والصلاة اعلى النبي متكرره

كانت الآلام تعكسها الدموع

أُمْنَا ما تحچي المها او تنكره

من يجي ليها الالم تطلب طبيب

نقرا آيات الذكر لمعطره

من تشوف اعيونا تهمر دموع

من دموع العين تملي المحبره

تكتب آيات الصبر منها الدموع

والقدر مكتوب ماحد يقدره

قلنا ليها العله ما ليها دواء

سبّحت للباري وهيّه اتكبرَه

ظَلْمه عند افراقها الدنيا اكيد

غرّة امنا بس بقت متنوره

غابت الانفاس وارتاح الحنين

ظنّه طابت ولوطنها امسافره

وُقْفَت ابكفها الانامل والدليل

سبحة الزهرا بيديها امحجره

من صعود الروح صعدت بالجمال

من جمال امنا اتغار المنظره

أُمْنَا جنّه صعدت العالي الجنان

لانها جنّه بالحياة امصغره

بس جسدها خلته لينا امان

عَهَد ويّا امْنَا يواريها الثرى

وينچ ام رضوان وصفي لي الربيع

قالت الزهره اعلى كفي مزهره

جاوبيني وانتظر منچ جواب

واعذريني وارجو مِنْچ المعذره

قلت ليها ايصير هالزهره تموت

واهيه بجذور الحياه مِجَّذره

ايصير من تحمل معاني للحياة

غايبه اوللموت تبقى حاضره

قصه مو مكتوبه من نسج الخيال

لاهي لحظة عين ظلت عابره

روحها ما بارحت نبع الحياة

والحياه ما تندفن بالمقبره

لو ردت توضيح اقصدها ام بليغ

بالقلوب اتعيش ويّا الذاكره

لو كتبنا اشما كتبنا ما نزيد

والقصيده ابحقها زهره امقصره

……………………………..

ابو مصطفى ال يوسف

17 شعبان 1439 هـ

3 مايو 2018

مرثية في فقيدنا الشاب الطيب الخلوق محمد تيسير الزوري

بلسان حال امه .. الله يخلف عليه بالجنة وعلى والديه بالخلف الصالح

……………………………………………

راح عمرك قبل امك باللحد

انت بس تبقى وآنا تالي ارد

وانت ورده بالربيع امفتِحه

وآني عمرك يالولد توني اعد

سبعه ولعشرين من عمرك غصون

جمعتها صارت ابفقدك عُقِد

كل غصن يبني ترى دون الغصون

كِنِت باني ابها الك احلى مهِد

بعده ما خلص ربيعك والشَّهَر

جاني وسط الليل هاتف من بُعِد

قومي يا افراح بسچ هالمنام

وابشري ابأخزان منّي هالوعِد

اتهيئِت وجهك شمس آخر صباح

يعني من تشرق ترى ماظن تِرِد

فكّرت كابوس لكن صبحي صار

موتتك طلعت صواعق بالرعد

ادري يوليدي القدر حتمن يصير

لاَني ابهاذي الفجيعه انفِرِد

كل قدر لابد لابن آدم يصير

كاتب المعبود بجبين العبِد

ذكريات الحلوه يمحمد تطير

تبقى بس نار ابرحيلك تنوقِد

من تمر كل بيت لرحامك تزور

وانت من ودك اليهم هم اوِد

طلبتي يُمَّه تلبيها ابسرور

طلبتك هاليوم من عندي شَرِد

كملت لفروض من عمرك صغير

زيارة اهل البيت تبني ابها مجِد

من وصل نعشك يوِلْدي المقبره

نزلوه المؤمنين ابيا بُعِد

نزله اولى صارت اتسلم عليك

ام رضا بشموع لجلك تستعِد

ثاني نزله كانت ابجنب المصاب

نسمع ام جاسم قلبها ينمرد

ثالث النزلات روحي ابها تلوج

لنها ثالث نزله عالتراب اللحد

من تنام ابقربهم هم يسألوك

ليش مستعجل ابجيتك منفرِد

قول ليهم انا ما عندي جواب

امّي عدها قصتي بحلى سرِد

يمكن اتقول السبب ليكم يزور

ساعه ليكم ساعه لي محمد يرِد

وآنا ظني بيه يصدق بالوعود

من يعِد ليّه ونا منّي وعِد

افْتَرِش لحده ونا شرطي وحيد

ايقوم من لحده وقت آنه التِحِد

……………………………………………

ابو مصطفى ال يوسف

4 ربيع الثاني 1439 هـ

22 ديسمبر 2017

مرثية للوالدة رحمها الله بواسع رحمته

……………………………….

مَرْيَم ابَهذا الشهر وِين المكان

صِرنا نِدخل غُرفَتِچ ِلمْعَدّله

فيها لِمْصَلى انْفَرش نَايم اشُوف

تُرْبَته سَجْده عَلِيچ امْفَصله

سَبْحه يَم التُربه مَحْطوطه تِِعيش

بَصْمتِچ كل حَبّه فيها امْسَجَّله

فوق لِمْصَلى كِتاب الله خُشُوع

سُورة إلْياسين تَوْها امْرَتَله

والعطور الِّي عَلى شِلف الجدار

مِن نِشْمْهَا انْقُول مريم داخِلَه

نِفْتَح الدولاب وانْحَصِّل رُفُوف

امْصَفَفَه اهْدُومِچ اوُتَوهَا امْغَسَله

ثُوب يِزْهي ابْلون نِذْكُر ذِكْريات

تِلْبَسه لمُنَاسَبَات الفاضِلَه

تِعْشق الزّهرا وكِل مَولِد تُقُوم

علنبي اتْصلي وتِزهي ابْمَحْفَلَه

ومِن ثِياب السّود دَقَقْنا النظر

شِفنا عالزهرا دُمُوعچ هامِله

منْ اثَر لِدْموع بِثْيَابچ ثِقَال

ظَلّت اثْيابِچ اثرها امبلله

حتى ثُوب الْكَان يِزهي شِفْنا بِيه

ورده رويانه قسم مو ذابله

اغْصُون لِرِّيحان كِنْتِي تِقْطِفِيه

ما اظِنْ لِليوم رِيْحَه اتْعَادِله

شِفنا بِالدُولاب مِنْديل اشْحَلاه

اثر مِن عِينِچ ومِيل المكْحَله   

مِنْ نِجي للْباب نِمْسِك يَدّتِه

قبل ما نِفْتَح نِشُوفچ مَاثِله

ما يّفِيد اوْيَايْ كِل قَلْبِي عِنَاد

هَمْ يِصُرْ إنّ ام رضا مُو شَايِلَه

كِيْف نتْخَيل صِيام ابْدُون مَايْ

مِنْهو غيرچ يِسْقي كِل الْعَايِلَه 

احْنا متْخَيَلنَا بِيتِچ بِالظَلام

صُوتِچ الفَانُوص يُمّه يِشْعِلَه

احْنا بَس نِجْلِس على السّفْره ابْشُعُور

جسد بَس والروح عَنّچ سَايِلَه

يُمّه لُو نِدْرِي قَرارِچ بِالرّحِيل

چَان كِل يُوم الرّحِيل انْعَطله

چان قِلْنا لِلْرحيل اسْتنّى عَاد

ام رُضا ما تِصْلَح الها رَاحِلَه

لَكِن المَكْتوب عِند الله السّؤال

رَحْمَه لِچ بِالزّهرا آنَا اتْوَسَلَه

كِل صَبَاح ابْطَلتِه يِخْفي الْجِراح

هَم جُرُحْنا ابْوّنه لازم نِنْقله

كِنّا ِنتْمنى تِطِل شَمس الصّباح

انْصَبِّحِچ بالخير يا مريم هلا

الف رحمه يَمْ رُضَا تِنْزل عَلِيچ

يَمِّچ الزّهرا ابْدُعَاها نَازِلَه

……………………………….

ابو مصطفى ال يوسف

١٢ يونيو ٢٠١٦

مرثية في رحيل سماحة الشيخ رضا الصغير رحمه الله تعالى بواسع رحمته ومواساة لاسرة الفقيد وندعو الله ان يلهمهم الصبر والسلوان.

…………………………………………

مستعجل على الروحه يشيخ الناس

وانت بالعمر بعدك على اسنينه

تأسيس العلم يبدا بِفِقْه الدين

تو بيت الفقه تعجن له الطينه

تاروت ابحلم تستنى لمّا اتفيق

تصحى اتشوف عالِم يفقه ابدينه

لمن لاح لينا بالأفق آمال

عالم مجتهد نترجى تكوينه

اسمع من مشايخنا شهادة نور

حزت المرتبه اوعلمك امقدمينه

يقولو كم سنه يصبح الك تأليف

من اوّل دروسك بدّى تدوينه

لكن كيف ياموت المنيه ايصير

تاخذ روح شيخ امبين ايادينا

حتمن من رضا عنّا مضى ما ضاع

لنّه ابجنته يسمع تهانينا

حاز المرتبه وبحسن لستقبال

صافح للرضا من مَدْها كفينه

اكثر من امصافح اييده للمعصوم

لحده امن الرضا بترابه بانينه

عدّى بختباره مغريات المال

عاف اشگد فرص غمض لها عينه

وضح للبشر عَقْد العلم تكليف

لو كان الشرط يترك اراضينه

حتى ببتلائه صار هم محظوظ

واحنا يادهر بفراقه تبلينا

يالدنيا العجيبه الموت بس تبقيه

من تدري ابفرحنا ابسرعه تمحينه

لكن للقدر لابد محطة خير

فيها يستريح المؤمن ابحينه

موت الغيبك ما سجلك بغياب

مو كل من يغيب انكتب تكفينه

موت الغربه اصلا فَصِل بالقانون

معدود ابشهاده ابكل قوانينه

وانت ابرحلتك طالب علم للآل

عد باب العلم وعظم سلاطينه

تنهل يا رضا من فيض راعي الجود

داخل جنته تشتم رياحينه

علم المصطفى بابه علي الكرار

وابريح الغري دارت طواحينه

ماخاب المحب لمن قطع لحدود

عد باب الرضا نزلت شواهينه

صوتك بالدرس لليوم ظل مسموع

نبرات البلاغه ابكل مضامينه

من يسمع حديثك ضيّع التاريخ

عدّيت العمر يمكن ثمانينه

نرفع تعزيه من ارضنا ابتاروت

ولطوس الرضا نبعث تعازينا

ورحم يا الهي شيخنا الملحود

وابأرض القداسه انكتب تلقينه

ولمعصومه نصبت مآتم التوديع

ام مدين جنبها ابكل طمأنينه

فاز ابهالفخر من عمَّمه المعصوم

لمن ما حضر نوّب علي احسينه

وابأمر المفدى خلفه تمشي الناس

طلاب العلم كلهم امشيعينه

…………………………………………

ابو مصطفى ال يوسف

25 ذو القعدة 1440 هـ

28 يوليو 2019

في حق الغالية امنا ام امين رحمها الله بواسع رحمته وادخلها فسيح جنته وحشرها مع محمد وآل محمد صلى الله عليه وآله وهي في ضيافة الزهراء عليها السلام.

……………………………………..

يا موت انت تدري الّمِتْنا اجروح

يوم اللي اجيت ابابنا لمّاح

ليش اتقول لمنا علتچ بتروح

تقصد من كلامك من وجع ترتاح

عِلّت امنا خفت من دوا الدكتور

قلنا العله طابت واختفت لجراح

لكن ما هگينا اتخونا الالفاظ

كلمت راحه عندك تقصد الارواح

يا موت اسألك لمن طرقت الباب

صدق امنا ام امين ابإيدها المفتاح

قاسي اشلون طبعك ما رحمت الاييد

تريد ابإيدها اتْصَبُّحنَا عالاتراح

اييد امنا عظيمه اوساجده لله

بالظلمه الينا تشعل المصباح

اييد اعلى اليتامى تمسح الاحزان

تسقيهم بيديها ترفع القداح

تنثر كل فرح مر بيها لال البيت

تعزف من ايديها نغمة المداح

اييد اتمسحت وقفت صلاة الليل

تسهر بالعباده للصبح من لاح

اييد اللي ارضعتنا باقيه لليوم

ماجف من لبنها وريحته فوّاح

اييد امنا كبيره ابكل عمل للخير

حتمن كل عملها ينحفظ بلواح

الله اختارها بعد المحن واليوم

فرحانه ومحنها ظلت ابلنياح

حقها بالفرح والموعد اشمحلاه

مولد للزچيه اتواعدت لفراح

سألناها الدليل اعلى الفرح واتقول

طير الجنّه واقف عاللحد صدّاح

وُصْفي يم امين البرزخ المذكور

قالت چنه صغرى اوطايره بجناح

برزخ ما نحسّه يم امين اشلون

قالت شايليني راح فوق الراح

شفت اليوم عبد الله وبوكم زين

واقف يمّي يسمع قصتي من راح

نحضركم ترانا اليوم موجودين

نسمع للذكر من صوتكم نرتاح

خلوكم على خط الايمه دوم

شفناها السفينه ابخمسة الاشباح

تحملنا السفينه وتتسع للكون

صلاة اعلى النبي تعمل عمل لرياح

كل مره نصلي عالنبي بالكون

تتعلى السفينه ولجنان افساح

في البرزخ كرامه تشبه الروضات

زوار الايمه تنحسب سُوّاح

برزخنا يمر ما كنّها والله اسنين

لأنْ شفنا البتوله وتطلب الايضاح

تسأل عن دمعنا وصدرنا الملطوم

جاوبنا المصيبه اللي علت برماح

قلنا احسين قالو ابكربلا مقتول

هلينا الدمع والحادي اطرماح

ظلت تبچي صاحت اه اه احسين

واحنا من بچيها يعتلينا انياح

طلبناها ابرجا ولمال دمع احسين

واحنا بالبكا ما غير عدنا اسلاح

وعطتنا كتاب ابيمنه ولمكتوب

دمع اللي انسكب مدفوع بالارباح

خبروا المرتضى واقف على لصراط

اعطتنا الزچيه ابإيدها المسباح

مو كل روح تعطى للصراط اتروح

بس احنا فقط مكتوب له ينراح

مثل الجنّه كوكب سابح ابهالكون

تسبيحة الزهرا اتصير لك سبّاح

من اجل الزچيه اتوسعت لجنان

من تربة فدكها ثُمَرة التفاح

لن بالجنه باب الروضه ظل مفتوح

من طحنت رحاها اطاير اللقاح

يا محلا الضيافه بالفدك اشجار

هزينا الجذع والثمر لينا طاح

……………………………………..

ابو مصطفى ال يوسف

24 جمادى الاخرة 1440 هـ

1 مارس 2019